Астанада XVI Еуразиялық KAZENERGY форумы өз мәресіне жетті. Kazakhstan Energy Week 2025 аясында өткен бұл шара әлемдік энергетика саласындағы өзекті үрдістер мен сын-қатерлерді талқылауға арналған басты алаңға айналды.
Форум Қазақстан Үкіметінің мүшелерін, Орталық Азия елдерінің ресми делегацияларын, халықаралық ұйымдардың басшыларын, әлемдегі ірі энергетикалық компаниялардың топ-менеджерлерін, жетекші сарапшылар мен ғылыми қауымдастық өкілдерін біріктірді. Талқылаудың негізгі тақырыптары – энергетикалық жүйелердің тұрақтылығы, инфрақұрылымды жаңғырту, жаңартылатын энергия көздерін енгізу, цифрландыру және жаңа энергетикалық тәртіпті қалыптастырудағы Орталық Азия елдерінің рөлі болды.
Биылғы форумға әлемнің 50 елінен 2,5 мыңнан астам делегат, сондай-ақ энергетика секторындағы 300-ден астам ірі компанияның өкілдері қатысты. Негізгі отырыс Тәуелсіздік сарайында өтті.
Іс-шараның жоғары деңгейде ұйымдастырылуы мен техникалық сүйемелдеуін қамтамасыз ету мақсатында Президент Іс басқармасы Инженерлік-техникалық орталығы форумның цифрлық инфрақұрылымын жан-жақты дайындады. ИТО мамандары инфокоммуникациялық жүйелердің бапталуы мен тұрақты жұмысын, арнайы техникалық шешімдердің жұмыс істеуін, сондай-ақ форумның баспасөз залдарына трансляциясын қамтамасыз етті.
Қатысушылардың өзара тиімді қарым-қатынасын қамтамасыз ету үшін төрт тілде синхронды аударма ұйымдастырылды. Бұл шара түрлі елдер мен ұйымдар өкілдері арасында ашық және нәтижелі коммуникация орнатуға мүмкіндік берді.
Еске салайык, Инженерлік-техникалық орталықтың негізгі бағыттарының бірі – әртүрлі деңгей мен ауқымдағы іс-шараларға техникалық қолдау көрсету. Жыл басынан бері ИТО мамандары 1800-ге жуық іс-шараны, соның ішінде 20-дан астам Мемлекет басшысының қатысуымен қамтамасыз етті.
